CEBU, Philippines – Anak sa consultant ni Talisay City Mayor Eduardo Gullas mao ang napili nga Sangguniang Kabataan (SK) Federation President sa Siyudad sa Talisay kagahapon.
Wala’y nisuway sa pakigbangga ni Madeliene Dela Torre, 21, sa Barangay Cansojong sa eleksyon kagahapon nga gitambongan sa mga SK chairmen sa 22 ka barangay.
Matud pa ni Dela Torre nga dakong hagit para kaniya ang maong posisyon tungod kay aduna may tahas nga nagtangag ingon man responsibilidad dili lang sa iyang barangay lakip na sa tibuok siyudad sa pagpangulo sa mga kabatan-onan.
Si Dela Torre maoy anak ni kanhi kapitan Arnie Dela Torre nga consultant sa merkado ni Mayor Gullas.
Nihural dayun sila si Dela Torre uban sa laing opisyales nga sila si Ivan Rey Tan sa Barangay Pooc nga maoy Bise Presidente, Samanta Labageta sa Barangay Tangke nga maoy Secretary, Jhessa Rhonna Briones nga maoy Treasurer, June Dave Ambagay nga maoy Auditor, Tom Rabaya isip PRO, Jea Abarquez ug Romjit Debalucos isip Sgt. at Arms.
Si Gullas miingon nga mahinungdanon ang papel sa mga kabatan-unan alang sa paglambo sa nasud.
Iyang gipasalig nga abli ang iyang buhatan sa pagtabang sa pederasyon. (/IBM)(BANAT NEWS)