CEBU, Philippines – Tulo ka mga tinun-an sa pagkamagtutudlo gikan sa University of the Visayas (UV), University of Cebu Lapu-Lapu ug Mandaue (UCLM) ug University of San Jose Recoletos (USJR) ang naapil sa Top Ten sa bag-ohay lang gihatag nga 2018 Licensure Examination for Teachers (LET) niadtong Marso 2018.
Ang nag top 3 mao si Jade Soronio Tagab, tinun-an sa UV ug lumad nga taga Bugho, San Fernando Cebu nakakuha og 88 percent, samtang ang tinun-an gikan sa UCLM nga nabutang sa Top 4 mao si Hannah Lei Pepito Pulvera nga nakakuha og 87.8 percent. Samtang sa LET-Secondary level nga nakakuha sa Top 10 mao ang tinun-an sa USJR nga si Ruel Romarate Yu nga nakakuha og 90.6 percent. Si Tagab nakahuman sa iyang elementarya sa Magsico Elementary School niadtong 2003 ug sa Magsico National High School niadtong 2007. Niadtong Nobiyembre 2017, nakalampos si Tagab sa iyang pagtungha sa University of the Visayas (UV)-Main Campus.
“We are so excited when we heard that we are in the top three,” matud pa ni Dr. Nerisa Lopez, dean of College of Education.
Dugang pa ni Lopez, si Tagab kanunay nga naa sa dean’s list apan nakahunong lang kini sa pagtungha sud sa pipila ka semesters. Tungod sa kalamposan, nalipay si Dr. Jose R. Gullas, Executive Vice President and Vice President for Finance sa maong tunghaan. Matud pa ni Gullas, usa kini ka “dream come true” nga adunay naka sulod sa top 3 nga gikan sa UV kay dugay na niyang gipahinumduman ang mga dean sa unibersidad nga buhaton ang tanan aron makaprodyus og topnotchers. Buot ni Gullas nga mahimong kabahin sa ika-100 nga anibersaryo sa maong tunghaan ang maong kalamposan. Matud pa ni Gullas ang palisiya sa UV mao nga kadtong mga estudyante nga masulod sa top 3 sa mga board Ulian sa gastos sa ilang pagtungha. (Ericalene S. Tanudtanud/IBM)(BANAT NEWS)