CEBU, Philippines – Usa ang patay ug 14 ang naangol lakip na ang drayber sa multicab human sila natagak sa bung-aw sa may National Highway, Barangay Inoburan, Naga City, human sila nadumbolan sa usa ka 10- wheeler truck niaging Martes sa alas 2 sa hapon.
Parehong paingon ang duha ka sakyanan sa dakbayan sa Sugbo gikan sa Carcar City apan kusog kaayo ang dagan sa 10-wheeler truck nga gimaneho ni Gilbert Macas Betenio, 46. Wala na kini nakapreno hinungdan nga iyang nadumbolan ang multicab.
Tungod sa kadako sa trak ug kakusog sa pagdumbol wala mapugngi sa drayber niini nga si Junet Caño Adorna ang sakyanan ug natagak sila sa maong bung-aw.
Gidiretso sa tambalanan ang 14 ka pasahero ug ang drayber apan si Chief Inspector Roderick Gonzalez nga nakahinabi sa Banat News miingon nga nakabsan sa kinabuhi nianang pagkagabii ang usa sa mga sakay nga si Daisy Bonita, 46.
Ang mga biktima pabilin pang giatiman sa tambalanan samtang ang drayber nga si Betenio gipaslak sa prisohan sa Naga City Police Station alang sa pagpasaka og kaso. (/IBM)(BANAT NEWS)