CEBU, Philippines — Patay ang usa ka 30 anyos nga lalaki samtang laing usa ang naangol human sila naigo sa kilat sa barangay Canlumampao, dakbayan sa Toledo.
Giila ni PO2 Joselito Genon sa Toledo City Police Station ang nakalas nga si Jayson Alicaba, 30, taga barangay Canlumampao.
Samtang ang naangol mao si Antonio Camingao, 35, taga Sitio Hardin barangay Carmen sa maong dakbayan.
Base sa nahipos nga report sa kapulisan sa Toledo nga namasilong ang duha sa usa ka payag nga walay bungbong tungod sa pagbunok sa uwan ug pagsige og panugdog ug kilat.
Apan wala nila damha nga paglipak, naigo ang payag sa kilat hinungdan sa ilang pagkalagpot ug nakaangkon og grabeng paso sa kalawasan.
Dali silang gidala sa mga residente padung sa Toledo City District Hospital apan si Alicaba gideklarar sa nag-atiman nga doktor nga wala na kini kinabuhi pag-abot sa tambalanan.
Samtang si Camingao nakaling-kawas apan padayon pang nagpaalim sa nahiaguman nga mga paso.
Sa mga nakalabay nga mga adlaw nasinati ang pag-uwan sa nagkadaiyang bahin sa Toledo matag hapon inubanan sa pagpanugdog ug kilat. (BANAT NEWS)