CEBU, Philippines – Karong adlawa gikatakda nga motambong si Presidente Rodrigo Duterte og duha ka kalihokan sa dakbayan sa Sugbo ug ingon man sa lungsod sa Alegria.
Si Duterte gipaabot nga maoy moabli sa production valve sa Oil and Gas field sa barangay Montpeller sa lungsod sa Alegria.
Ang seremonya magsugod alas 3 sa hapon didto mismo sa production site kon diin ipahigayon ang ceremonial Valve Opening sa Polyard-3 Well.
Si Duterte gipaabot nga mohatag sa iyang mensahe atol sa programa nga himoon sa maong site ug siya ubanan ni Alegria Mayor Verna Magallon ug Lam Nam ang Chairman sa China International Mining and Petroleum Company Limited (CIMP Co. Ltd).
Ang Department of Energy (DOE) nihatag og pagtugot sa CIMP alang sa production sa lana sa maong lugar human nakita nga adunay commercial quantities ang natural gas ug oil nga naa sa Alegria.
Gibanabana nga moabot 27.93 billion ka barrel sa oil (MMBO) nga adunay possible “production recovery” nga moabot sa 3.35 MMBO ang makuha gikan sa maong oil field.
Moabot usab ngadto sa 9.42 billion cubic feet ang nakita nga lana sa maong site didto sa Alegria.
Ang mayor sa Alegria nalipay niini kay nagtuo siya nga makapalambo kini sa ilang lungsod ug daghan ang makatrabaho nga mga taga Alegria.
Mao kini ang unang higayon nga si Duterte makasaksi sa unang produksyon sa lana sa maong lungsod. Human sa Alegria si Duterte mobiyahe usab padulong sa Cebu City Sports Complex sa dakbayan sa Sugbo alang sa pagbukas sa Philippine National Games 2018 nga tambongan sa kaliboang mga atleta gikan sa nagkalainlaing probinsya sa nasud.
Samtang ini’g ka ugma adlaw nga Domingo motambong si Duterte sa pista sa lungsod sa Tabogon kay iyang paryente ang mayor sa maong lungsod nga si Mayor Zigfred Duterte.
Tungod niini, gipahugtan sa kapolisan ang seguridad sumala pa ni PRO 7 Regional Director Police Chief Superintendent Robert G. Quenery.
Matud pa ni Chief Senior Inspector Welther Grapa, walay hulga silang na-monitor sa pag-abot ni Duterte apan gipalig-on gihapon nila ang seguridad.
Malipayon ug naghinam-hinam gyud ang mga taga Tabogon sa pag-abot ni Duterte sanglit usa lamang sila ka third class municipality ug labing una kining higayon nga mamista kanila ang pangulo sa nasud. (Shaira Gwen T. Laluna /IBM)(BANAT NEWS)