CEBU, Philippines – Ipaimbestigar ni Special Assistant to the President Christopher “Bong” Go ang mga colorum vehicles sa Bohol ug Cebu kabahin sa giingong pagpangontrata niini sa plitehan sa mga pasahero.
Nagkanayon si Go atol sa press conference nga gipahigayon kagahapon nga aduna silay reklamo nga nadawat diin dunay mga drayber sa taxi sa Bohol ang dili magpasakay kung dili kini ikontrata.
Ang director sa Land Transportation Franchising and Regulatory Board (LTFRB-7), Ahmed Cuizon, niasoy nga sagad sa mga mangontrata mao kadtong mga walay meter o markings.
Sumala pa ni Cuizon nga usa sab sa rason nganong nigara ang pagpangontrata ang mga colorum vehicles sa Tagbilaran Port tungod kay wala’y CCTVs sa maong pantalan hinungdan nga dili sila ma-monitor pag-ayo.
Si Go nibutyag nga aduna sila’y dili mominus 10 ka colorum vehicles sa Bohol ang ilang nadakpan sa buwan sa Abril.
Samtang sa Cebu, aduna sab sila’y mga reklamo nga nadawat ug buot nilang hugtan pa ang pagpatuman ug pagmonitor niini ilabi na sa mga pantalan ug airports.
Nipahimangno si Cuizon ngadto sa mga pasahero nga adto gyud mosakay sa sakto nga dapit ug i-check kon kini legal ba nga pasaheroan.
Giawhag sab niya ang katawhan nga mosumbong gyud sa buhatan kon sila makasugat og pagpangontrata aron kini masilutan.
Ang LTFRB mopahigayon og seminar ug training alang sa mga taxi operators sa Bohol karong semanaha. (CNU Intern/GMR)(BANAT NEWS)