CEBU, Philippines – Gisikop ang 32-anyos nga kargador human kini nakuhaan og drugas sa may Tabunok Public Market sa Dakbayan sa Talisay niadtong Lunes sa gabii.
Ang nasikop mao si Martin Segovia, taga Sitio Luy-a, Barangay Lawaan sa maong siyudad.
Nipahigayon og checkpoint ang kapolisan nga gipangulohan ni Police Inspector Rene Cerna ug kaubanan.
Dihang gipara nila ang motor nga gimaneho ni Segovia, wala kini gikapakita nga lisensya ug sa dihang gisusi ang gisakyan niini adunay nakuha nga tulo ka gagmay nga putos sa shabu.
Gibana-bana nga mobalor og P1,100 ang shabu nga nasakmit.
Sa pagkakaron nagtingkagol na sa prisohan si Segovia ug giandam na ang pagsang-at sa tukmang kaso. (/GMR)(BANAT NEWS)