Kasohan una ipublikar, o ipublikar una kasohan?

CEBU, Philippines — Managlahi og gusto nga mahitabo sa pipila ka mga konsehal sa Barug Partido Demokratiko Pilipino-Lakas ng Bayan labot niining paghingalan sa mga   narco-politicians.

Ang Philippine Drug Enforcement Agency (PDEA)-7 gipaabot nga mopagawas sa lista karong semanaha sa mga barangay officials nga naa sa narco-list subay sa mando ni Presidente Rodrigo Duterte.

Si Konsehal Raymond Garcia pabor niini aron masayod ang katawhan ug makadesisyon pagbotar sa tarong nga kandidato.

Apan buot niya nga kadtong mapangalanan pasakaan gyud og kaso ug dili lang kutob estorya.

Apan ang kaalyado ni Garcia nga si Konsehal Pastor Alcover Jr. gustong pakasohan una ang politiko ayha pa pangalanan kay mao kini ang pinasubay sa due process ug peligro mamahimo kining hinungdan sa kagubot.

Nasayran nga dunay 211 ka mga opisyal sa barangay sa tibuok nasud ang nalakip sa listahan ug dili momenus 20 niini gikan sa rehiyon siete. (/IBM)(BANATNEWS)