CEBU, Philippines – Nakaangkon og nagkalain-laing reaksiyon gikan sa katawhan ang insidente nga mitumaw diha sa dalan Colon, dakbayan sa Sugbo niadtong adlaw’ng Huwebes, Abril 19 nga nakuhaan og hulagway ug nag-viral sa facebook.
Si Cebu City Mayor Tomas Osmeña sa iyang bahin, mipadayag nga makaguol ang maong hitabo apan angayan usab sabton nga “repeat offenders” na ang maong mga manindahay.
“What I’m saying is luoy, they’re poor but don’t worry they’ll be back tomorrow then they’ll be back again the day after that’s what happens all the time, comeback the next day so we have to decide whether were going to give Colon to the vendors but if we decide to do that half of the people from Bohol will come here”, matud ni Mayor Osmeña.
Gihimug-atan sa mayor nga wala gyud mausab ang palisiya sa siyudad labot sa mga manindahay diin kon ang tag-iya og tindahan dili moreklamo dili kini hilabtan sa mayor apan kon makadawat siya og reklamo kinahanglan niya mohimo og lakang.
Kahinumduman nga nakaangkon og mga pagsaway ang Prevention Restoration Order Beautification and Enhancement (PROBE) team sa Cebu City tungod kay giingong gipangyabo sa maong grupo ang baligya sa manindahay diha sa dalan Colon dihang ilaha kining gibadlong.
Apan ang pangulo sa PROBE Raquel Bohol Arce mihatag og katin-awan labot sa maong hitabo diin iyaha kining gi-post sa iyang facebook account.
Matud ni Arce nga ang PROBE team nagpahigayon og clearing operation sa dalan Colon dihang ilang nakita ang dili mo menos 11 ka manindahay nga naglinya ug ni-ukopar sa usa ka lane sa dalan Colon.
Dihang gidakop ang maong mga manindahay giingong misukol kini human nakita nila nga daghan sila itandi sa mga sakop sa PROBE nga lima lang niadtong higayona ug dunay uban giingong nakasibat.
Gipasabot ni Arce nga ang mga manindahay nasayod nga kon moabot na sa ikatulo ka higayon nga sila madakpan dili na nila malukat ang ilang mga paninda.
Giingong wala magkuwang ang PROBE sa pagpahimangno sa mga manindahay gani nipahigayon na sila og rekoreda, seminar ug meetings sa mga vendor apan matud pa dunay uban gustong mamintaha. (/BDB)(BANAT NEWS)