CEBU, Philippines – Tulo ka mga lalaki ang nakalas samtang usa ang nalandig sa tambalanan human giingong naglalis tungod lang sa curfew alas 12:30 sa kaadlawon kagahapon sa usa ka drug rehabilitation center sa St. Provedence Homes barangay Cansojong sa Dakbayan sa Talisay.
Ang mga namatay mao sila si Thomas Woodruff, 24, taga Argao ; Ervyn Ian Enilo, 38, taga Clarita Village, Punta Princesa, Cebu City kinsa giingong maoy drug rehab counselor sa pasilidad ug ang gituohang suspek nga si Archie Abastillas, 38, taga Sitio Nonoc, Barangay Tabunok.
Si Abastillas gidudahang namatay tungod sa paglaslas sa kaugalingong pulso. Samtang ang naangol mao si Lendon Carpeso, 24, taga sitio Mahayag, Barangay San Isidro, Talisay City.
Matud pa ni Police Supt. Marlu Conag, hepe sa Dakbayan sa Talisay, base sa ilang inisyal nga imbestigasyon naglalis ang mga nagpuyo sa maong apartment nga gitawag ug Half-Way House tungod sa ilang curfew.
Matud pa ni Conag, nakasab-an si Abastillas ni Enilo kay niuli nga lapas sa curfew nga alas-10 sa gabii. Human niadto, nangatulog ra sila apan dihang lawom na ang kagabhion gitagsa-tagsa sila og kabayo sa suspek ug gipangtigbas.
Si Carpeso ang nakamata ug nakadagan dayon nikatkat sa koral padung sa balay nilang Setente hinungdan nga kini naluwas. Naabot ang mga polis nga nakit-ang nagbuy-od na sa sawog ang mga biktima lakip ang suspetsado nga naglunang sa kaugalingong dugo.
Si Conag niingon nga ilang gisusi kun kinsang tawhana ang naghatag og pagtugot sa mga biktima aron himuon nga drug rehab ang maong lugar.
Si Ian Setente, silingan sa mga biktima nibutyag nga usa ka semana pa siya nakabantay nga dunay mga lalaking nangabang sa pikas balay nga karon nangamatay.
Matud niini, si Corpeso lang maoy iyang nakaila-ila ug kini nitug-an kaniya nga pulos sila drug dependents ug ang ilang pag-estar sa lugar mao ang pag-rehab sa ilang kaugalingon.
Ang inahan sa usa nga nakalingkawas sa pagpanigbas nibutyag base sa pamahayag sa iyang anak, nangatulog na sila sa dihang nakamata kay adunay nanghampak kaniya, diay to gitigbas na kini.
Samtang ang igsuon ni Abastillas dili motuong mabuhat kadto sa igsuon kay mao pa kini mismo ang nanghangyo nga magpa-rehab tungod kay gagmay pa ang mga anak niini. Sumala pa niini kanhi tanod ang igsuon apan niundang kay di katulog.
Samtang ang igsuon ni Woodruff, nitug-an nga gikan usab sa pribado nga rehab center ang iyang igsuon ug nakaila niini si Enilo nga usa ka drug rehab counselor sa halfway house. Ang maguwang dili kadawat sa kamatayon sa iyang igsuon.
Samtang ang maguwang ni Enilo nga si Jun, dili usab makadawat sa kamatayon sa iyang igsuon kay nagtrabaho lang kini sa nahitaboan.
Si Dr. Rey Cesar Bautista, pangulo sa Talisay City Office Rural Health Unit, nitug-an nga si Carpeso girekomendar “for residential rehab” maong nahibulong kini kon nganong naabot kini sa Halfway House ni Enilo.
Gibutyag ni Bautista, si Woodruff mag-anhaan usab kini sa ilahang “After Care Program” human nakakompleto sa programa niini sa rehab facility sa Argao ug anaa na kini sa reintegration phase ug igo na lang sila monitoron. Si Bautista, nitug-an nga si Enilo maoy niatubang niya ug nipadayag nga siya nay bahala sa mga namatay. Matud niya gi-bypass siya niini ug mi-operate sa maong drug rehab center bisan walay permit. (Rowena D. Capistrano/IBM)(BANAT NEWS)