CEBU, Philippines – Gipahigayon kagahapon sa buntag ang ground breaking diha sa Barangay Inayawan, dakbayan sa Sugbo alang sa tukuron nga bag-ong buhatan sa Cebu City Police Station 7 ug karong adlawa sugdan ang construction niini.
Ang luna nga tukuran sa maong proyekto mokabat ngadto sa 700 square meters ang gilapdon niini nga nahimutang atbang sa barangay hall ug ang barangay maoy giingong tag-iya sa luna ug gidonar ngadto sa Philippine National Police. Matud ni Police Senior Superintendent Joel B. Doria nga ang kasamtangang police station 7 komplikado ang kondisyon tungod sa kagamay sa lugar ug ang detention cell niini ang unang lantada imbes ang opisina.
Ang kapolisan mipasalamat kang Kapitan Luther Lee Soon sa Barangay Inayawan tungod sa nahimong tabang niini kabahin sa luna aron matuman ang maong proyekto.
Matud ni Soon nga karong adlawa sugdan ang construction sa maong proyekto diin ang budget niini mokabat ngadto sa P4.8 milyones nga gikan sa PNP.
Ug gibana-bana nga ang maong proyekto matapos kini sulod sa unom ka buwan ngadto sa usa ka tuig. (Jomelyn B. Largado, CNU Interns/BDB)(BANAT NEWS)