CEBU, Philippines — Naugdaw ang usa ka balay human giunay og sunog sa live-in partner sa tag-iya sa Barangay Nalhub, Dalaguete niadtong Sabado sa udto.
Si Alberto Catalan, 34, ang gitumbok nga niunay pagsunog sa ilang panimalay human nagkalalis sa iyang kapuyo nga si Victoria Tanola, 33, kinsa dunay duha ka anak nga edad og 5-anyos ug usa ka tuig.
Sa inisyal nga imbestigasyon sa kapolisan nasayran nga samtang naghisgut og mga personal nga butang ang managkapuyo, giingogn kalit nipagawas og estorya si Catalan kabahin sa ilang “hidden issue” nga nakapainit sa panag-estoryahanay ug nisangpot sa pagsunog sa balay.
Si Tanola daling nitawag sa Mantalongon Fire Sub-Station hinungdan nga niresponde ang kabomberohan apan 10-minutos pa una naabot ug naugdaw na ang panimalay tungod kay hinimo lang kini sa kahoy ug daling nakaon sa kayo.
Nikabat sa P30 mil ang danyos nga gibilin sa sunog lakip ang P3 mil nga kwarta.
Si Catalan daling nisibat human sa panghitabo ug gipangita sa kapolisan. - Erly Ann Alcontin, CNU Intern (BANAT NEWS)