181 ka libo ka sakyanan narehistro sa LTO-7 sa 2017

CEBU, Philippines - Niabot sa 181,000 ka bag-ong sakyanan ang narehistro sa Land Transportation Office (LTO-7) sa tuig 2017.

Matud ni LTO-7 Director Victor Emmanuel Caindec nga nalakip na kini sa 800,000 ka sakyanan sa tibuok rehiyon. Gitataw ni Caindec nga wala magpasabot nga ang usa ka sakyanan nga narehistro sa usa ka probinsya, diha ra kini gigamit apan adunay uban nga sa silingang lalawigan gigamit.

“So posible na ang imong sakyanan, narehistro gigamit sa Bohol, napalit sa Cebu. So ang data nato can only capture vehicles registered within the regional walay specific kun asa nga province,” matud ni Caindec.

Matud ni Jonathan “Joy” Tumulak, focal person on traffic management sa Kapitolyo, nga sa  bag-ong rehistrado nga mga sakyanan sa niaging tuig, 134,000 niini mga motor.

Wala pa niya makuha ang datus sa tuig 2018 apan sa trend nga iyang nakita gipaabot nga mosaka pa ang bag-ong sakyanan sa Probinsiya sa Sugbo karong tuiga nga nakatampo sa kahuot sa dalan.

Si Tumulak kinsa nitambong sa Traffic Impact Assessment (TIA) sa kaulohan niduso og rekomendasyon sa pagsulbad sa isyu sa trapiko sa lalawigan ilabi na sa mga siyudad.

Lakip niini ang pagpaubos sa work week ngadto sa upat ka adlaw apan mas taas ang oras nga trabaho matag adlaw; flexitime ang working hours diin ang mga empleyado makapili sa oras nga mosugod ug mohuman sa ilang trabaho aron dili magdungan og gawas pauli o padulong sa trabaho.

Laing rekomendasyon mao ang pag-uniform sa traffic signs ug pagpalambo sa mga traffic lights ug ang “no left turn policy” nga i-implementar sa tanang klase sa mga sakyanan atol sa peak hours sa pili ka intersections.

Si Tumulak uyon sab nga i-regulate ang pagpalit sa mga sakyanan.

“Sa akong personal nga opinion in favor ko ana unya sa regulation. Kinahanglan pag magpalit og sakyanan kinahanglan dunay kaugalingon nga parking area,” matud ni Tumulak.

Ang mao niyang rekomendasyon iya na naduso ngadto kang Gobernador Hilario Davide III. (/GMR)(BANAT NEWS)