CEBU, Philippines — Mihatag sa ilang katapusang pagyukbo ang mga opisyal sa dakbayan sa Sugbo kang Monsignor Carlito Pono sa Cebu Metropolitan Cathedral kagahapon sa buntag. Si Pono mao’y team moderator sa St. Catherine of Alexandria sa dakbayan sa Carcar namatay niadtong Abril 6 tungod sa pneumonia.
Usa ka Misa Requiem ug send-off mass ang gipahigayon diha sa Cathedral ug ang patay'ng lawas niini gihatod ngadto sa St. Catherine of Alexandria Parish sa dakbayan sa Carcar diin ipahimutang ang iyang haya. Ang nangulo sa misa mao si Archbishop Osvaldo Padilla, Apostolic Nuncio Emeritus to Korea ug ang mipahigayon sa wali mao si Padre Erik Orio.
Mitambong sa misa sila si Cebu City Mayor Tomas Osmeña, Vice-Mayor Edgardo Labella, ug Konsehal Margot Osmeña.
Lakip sa mga mitambong ang kaparian sa Sugbo, pamilya ni Msgr. Pono ug mga tawo nga duol sa kasing-kasing niini.
Atol sa maong misa mihatag usab ang Cebu City Government og token of appreciation sa pamilya ni Pono pagpasidungog sa iyang mga kontribusyon sa dakbayan sa Sugbo isip usa ka aktibong miyembro sa Cultural and Historic Affairs Commission (CHAC).
Ang haya ni Pono dad-on ugma (Sabado) sa lungsod sa Pinamungajan nga iyang lugar nga natawhan ug ngadto sa maong lungsod usab siya ilubong sa adlaw’ng Lunes. (Erly Ann Alcontin, CNU Intern/BDB) (BANAT NEWS)