CEBU, Philippines — Gisikop sa kapolisan si kanhi mayor Augustus Cesar Moreno sa lungsod sa Aloguinsan taliwala sa iyang pagtagutago human siya giisyuhan og warrant of arrest tungod sa kaso nga graft and corruption nga giatubang niya didto sa Sandiganbayan.
Si Justice Rafael Lagos sa Sandiganbayan 5th Division maoy mipirma sa warrant of arrest tungod sa kasong paglapas sa Section 3 (e) sa Republic Act 3019, kon Anti-Graft and Corrupt Practices Act, nga gipasaka batok ni Moreno ug sa iyang asawa nga si Cynthia.
Ang kanhi mayor didto madakpi sa iyang panimalay sa polis nga gipangulohan ni Inspector Sigmund Freud Cruz, bag-ong hepe sa Aloguinsan, nga nakadawat sa warrant of arrest gikan sa Sandiganbayan.
Abtik hinoon kaayo nga mibutang og piyansa nga P60 mil si Moreno didto sa Regional Trial Court sa Dakbayan sa Toledo kagahapon sa hapon.
Ang asawa ni Moreno nga si Cynthia, kanhi mayor gihapon sa Aloguinsan, gipangita pa sa mga polis kay apil siya nga gikiha kay nitugot nga ang lungsod mamalit og kapin sa P200 mil nga kantidad sa pan gikan ra sa ilang gipanag-iya nga bakery.
Apil nga gikiha mao ang mga sakop sa Bids and Awards Committee (BAC) sa lungsod. Kaniadtong Pebrero, si Mayor Augustus Moreno mi-resign sa katungdanan.
Nasayran nga si kanhi mayor Cynthia Moreno napamatud-an usab nga guilty sa pagpamalit sa lungsod og mga P1 million nga kantidad sa mga construction materials nga walay klaro nga bidding. (BANAT NEWS)