CEBU, Philippines — Luha tungod sa kalipay gikan sa mga piniriso ang nisugat sa imahen sa Señor Sto. Niño sa pagbisita niini sa Cebu City Operation Second Chance Center ug sa Cebu City Jail.
“Mahay kaayo ko sa akong gibuhat. Dako kaayo’g tabang ang pagbisita ni Señor Sto. Niño karon kay gaan ako kasing-kasing,” matud sa 16-anyos nga alyas Lamin, kinsa nadakpan sa pagpamaligya og ginadiling drugas.
Gipahinumduman ni Father Pacifico Nohara Jr., rector sa Basilica del Sto. Niño, sa iyang wali ang mga menor de edad nga mga piniriso nga bisan naa sila sulod sa center nagpabilin ug anaa gihapon ang kalooy ug ang paghigugma sa Ginoo sa mga makasasala.
Matud ni Lamin nga pangayo niya ngadto sa Balaang Bata nga mapadali ang iyang paggawas sa center ingon man sa iyang inahan ug apohang babaye nga nadakpan sab tungod sa pagbaligya og ginadiling drugas sa niaging tuig.
Gidala sab dayon ang imahen sa Cebu City Jail Female Dorm diin kini mainiton nga gidawat sa mga babayeng binilanggo kinsa nagkupot sa ilang tagsatagsa ka rebulto ni Señor Sto. Nino.
Si alyas Lai, 39-anyos, ug kapin duha ka tuig na nga napriso tungod sa illegal recruitment, niingon nga gipanalanginan siya kay niduaw ang Balaang Bata sa iyang adlaw nga natawhan. Dugang ni Lai nga walay niduaw niya nga pamilya ug mapasalamaton gihapon siya tungod kay labaw pa sa pamilya ang nibisita kaniya. (BANAT NEWS)