CEBU, Philippines - Gihulagway sa kapolisan sa Siyudad sa Talisay nga pagpangharas ngadto kanila ang gibuhat ni Roberto Bonghanoy Fernan sa pagpasaka og kaso sa buhatan sa Ombudsman human gironda ang iyang panimaye sa Barangay Maghaway niadtong Hulyo 7.
Siya nipasangil nga gikawatan og P200 mil dungan sa pagkasakmit sa 12 ka gagmay nga pakete sa shabu ingon man KG-9 submachine gun lakip na ang magazine ug mga bala sa .9mm atol sa buy-bust operation.
Si Senior Insp. Albert Quilotorio, deputy chief sa Talisay City Police Station, niingon nga katungod sa dinakpan nga mopasaka og kaso apan iyang gipasabot nga tuyo lang niini nga maluya sila sa paghimo og operasyon batok sa mga tawo nga nalambigit sa ginadiling drugas.
Matud niya nga kompleto ang ilang dokumento labot sa ilang pre-operation ingon man post-operation diin sakto ang ilang koordinasyon sa Philippine Drug Enforcement Agency.
Si Quilotorio nitataw nga naila nga drug pusher ingon man hitman si Fernan sa drug personality sa ilang lugar nga si konsehal Felix Abacajan kinsa gika-engkwentro sa mga sakop sa Provincial Intelligence Branch (PIB) niadtong nilabay’ng tuig.
Nisurender na sab si Fernan sa ilang buhatan tungod sa pag-angkon niini og pugakhang
Sigun pa ni Quilotorio nga daghang tawo nga nangabugar ni Fernan nga siya pasakaan og mas gaan nga kaso aron makapiyansa ug gani aduna pay nitanyag og salapi aron makabuhi si Fernan.
Apan si Quilotorio nipasabot nga ila gyud gipasakaan og kaso si Fernan base sa mga ebidensya nga ilang nakuha.
Si Fernan giisip sab nga suspek sa pagrapido sa Talisay City Jail niadtong Hulyo 26 ilabi na kung magtakdo ang armas nga gigamit sa KG-9 sa suspek.
Masaligon hinoon si Quilotorio nga maabswelto ang iyang mga sakop sa kasong gipasaka ug dili kini maoy rason nga maluya sila sa ilang trabaho ug giisip nila kini nga hagit sa ilang propesyon. (BANAT NEWS)