Peter Lim nahadlok

CEBU, Philippines - Negosyanteng si Peter Lim nahadlok sa iyang seguridad tungod niining mga pasangil kaniya nga nalambigit siya sa negosyo sa ilegal nga drugas, ilabi na nga aduna nay mga nangamatay sa mga personalidad nga gipangalanan ni Pres. Duterte.

Si Lim mipatawag og press conference kagahapon diha sa iyang  opisina  sud lang sa pipila ka minutos.

Ang 70- anyos nga si Lim niangkon nga dili na maayo ang kahimtang sa iyang panglawas  tungod sa kidney failure ang niatubang sa mga tigbalita ug mapasalamaton nga mahatagan siya og oportunidad nga malimpyo iyang pangalan.

Matud pa ni Lim, tanang mga pasangil batok kaniya pulos bakak ug fabricated ug karon nahadlok na siya ug ang iyang pamilya sa iyang seguridad kay magtuo unya ang mga tawo nga tinuod kini.

Matud ni Lim wala siya sukad niapil-apil sa negosyo sa ilegal nga drugas.  Matud niya iyang atubangon ang kaso diha sa Department of Justice.

Ang anak niya nga si Caryl nipadangat sa iyang mensahe nga ilang gihangop ang imbestigasyon kay mahatagan ang iyang amahan og kahigayonan nga malimpyohan ang pangalan niini.

"We ask for your compassion and understanding. Please reserve your judgement against our father. We are confident that he will soon be cleared of these baseless allegations and the country will know the true Peter Go Lim- a loving father, a doting Lolo, a caring uncle, a loyal friend, and a God-fearing Cebuano," matud pa ni Caryl.

Samtang si kanhi mayor Michael Rama sa Dakbayan sa Sugbo kinsa usa usab sa mga gipanganlan ni Duterte nga  drug protector nipatim-aw sa buhatan sa CIDG-7 kagahapon sa buntag.

Apan wala mohatag si Rama og impormasyon bahin sa iyang pakigkita sa hepe sa CIDG-7 nga si Superintendent Royina Garma apan nahinangop siya nga aduna nay naglihok nga mga ahensya sa gobiyerno ug kung maayo ang intensyon kinahanglan kini nga suportahan. (BANAT NEWS)