CEBU, Philippines - Dili na apilon sa pagkolekta sa kagamhanan sa Dakbayan sa Talisay ang mga electronic waste.
Kini human si Mayor Eduardo Gullas ang nipagawas og memorandum sa pag-istrikto na sa pagkolekta sa klase sa mga basura.
Si Edwin Nierves, pangulo sa Solid Waste Management sa siyudad, nagkanayon nga ila na nga gisunod ang kamanduan ni Gullas.
Ang electronic waste nga gipasabot mao ang mga basura sama sa piyesa sa mga sakyanan, ligid, refrigerators, computers ug uban pa.
Giila ang mga basura nga non-biodegradable nga kun kini magtapok sa landfill hayan momubo ang tuig nga mahimo pang malabayan ang landfill tungod kay dali man kini mapuno.
Gitug-an ni Nierves nga ilang gibana-bana nga moabot na lang sa tuig 2020 nga mahimong malabayan ang landfill.
Apan iyang gipadayag nga kun sakto lang nga molain sa ilang mga basura ang mga residente hayan mahimo pa kining mapuslan hangtud sa tuig 2025.
Ang Talisay makakolekta og 110 tons nga basura matag adlaw gikan sa 22 ka barangay. Nagsugod pag-operate ang landfill niadtong tuig 2005. - /GMR) (BANAT NEWS)