CEBU, Philippines - Mipalabang ang Hunta Probinsiyal og resolusyon sa pag-endorso sa hangyo ni Gob. Hilario Davide, III ngadto sa Department of Budget and Management pag-release ug pag-download sa P6 milyones nga pundo. Ang maong pundo alang sa pinansiyal nga hinabang ubos sa Local Government Support Fund-Financial Assistance (LGSF-FA). Ug ang nahisgutang pundo, igahin sa health ug social services sa mga kabus sa ikaduhang distrito sa lalawigan.
Sila si Bokal Jose Mari Salvador ug Christopher Baricuatro nagkanayon nga ang mga LGU, nag-atubang og mga hagit sa paghatag sa mga serbisyo lakip na niini ang health ug local services.
Matud nila nga lakip sa Fiscal Year 2017 General Appropriation Act, ang LGSF-FA sa mga LGU aron masuportahan ang ilang priority projects ug programa nga mao ang paghatag og social services sa panglawas, medical, burial ug food assistance ngadto sa mga kabus niining mga konstituwente.
Ang delivery sa maong health ug social services, kabahin sa giaprobahan nga Annual Investment Program sa probinsiya. Dugang sa maong mga opisyal nga ang ikaduhang distrito nagsentro kini sa paghatag og tabang ngadto sa mga kabus nila nga mga konstituwente. (BANAT NEWS)