CEBU, Philippines - Hingpit na gyud nga naugkat ang tanang 168 ka ballot boxes nga gisudlan sa mga balota ug ubang election paraphernalia nga giprotestahan ni kanhi mayor Michael Rama ug gitinguha niya nga iphon pag-usab adto sa Comelec-Manila.
Milanat og upat ka adlaw ang pag-utingkay sa mga kawani sa Comelec ug City Treasurer’s Office sa upat ka container vans nga gisudlan sa mga ballot boxes aron matigum nila ang kinatibuk-ang 168 ka ballot boxes.
Ang maong mga ballot boxes maoy gigamit sa 168 usab ka presento dinhi sa dakbayan nga matud ni Rama siya gitikasan ug hinungdan nga napilde siya ug naproklamar si Mayor Tomas Osmeña.
Base sa resulta sa piniliay, labaw og kapin sa 34 mil botos si Osmeña kay kang Rama mao nga siya ang gideklarar sa Comelec nga mananaog. Apan si Rama nga wala makadawat sa iyang kapildehan, misang-at og election protest didto sa Comelec-Manila. Si Osmeña nagkanayon nga sigurado siya nga human sa pagsubli pag-ihap sa mga balota nga giprotestahan ni Rama, siya gihapon ang modaog. Apan si Rama wala usab magpakawala sa iyang paglaum nga mausab ang resulta sa piniliay.
Matud ni Cebu City north district Election Officer Marchel Sarno nga huwaton pa nila ang minutes sa pag-imbentaryo sa mga ballot boxes nga giandam karon sa mga kawani sa City Treasurer’s Office aron iapil nila sa pagpadala sa Manila.
Kun dili mapadala sa Manila ang mga ballot boxes ugmang adlawa, unya na sa Domingo kini ikarga sa 2GO Shipping aron nga moabot kini sa kaulohan sa Lunes, ug may mga kawani sa Comelec nga makasugat niini.
Gipasabot ni Sarno nga dili mahimo nga himoon nila sa Huwebes o kaha Biyernes ang pagpadala sa mga ballot boxes tungod kay sa Sabado o Domingo na kini mahiabot sa pantalan sa kaulohan, ug wala na’y mga kawani sa Comelec nga makasugat.
Ang mga ballot boxes bantayan kini og mga polis atol sa paghatud sa kaulohan, ingon man ang Team Rama ug Bando Osmeña Pundok-Kauswagan (BOPK) gitugotan nga makapauban og ilang mga tigbantay. (BANAT NEWS)