CEBU, Philippines - Nahuman na ang phase 1 sa Tabunok Public Market sa Dakbayan sa Talisay, apan hangtud karon wala pa magamit sa mga manindahay ang bag-ong nahuman nga merkado.
Niadtong Abril 8, sumala sa gusto ni Mayor Eduardo Gullas nahuman ang merkado sa Tabunok apan wala pa kini ipagamit sa mga manindahay kay padayon pa nga gihulma ang Talisay Economic Enterprise and Investment Board (TEEIB).
Ang TEEIB mao ang modesisyon kun kinsa ang mahimong makabaligya, unsa ang ilang ibaligya, pila ang abangan ug uban pa.
Si Atty. Giovanni Sususco ang city legal officer sa siyudad nagkanayon nga iya nang gihimo ang TEEIB ug paaprubahan sa konseho pinaagi sa usa ka ordinansa.
Ang mahimong chairman niini mao si Mayor Gullas ug ang iyang mga sakop mao sila si Bise Mayor Alan Bucao, Ritchel Bacaltos, presidente sa Talisay City College, representanti sa Talisay City Chamber of Commerce ug abogado alang sa legalidad.
Nasayran nga daghan nang manindahay ang gustong mosugod sa pagpaninda sa bag-ong nahuman nga phase 1 sa merkado. Gani matud sa usa ka manindahay nga dili lang magpaila nga mahimo ra man unta nga dili na mohimo og selection board kay mahimo ra kini sa mga opisyal sa matag section sa merkado.
Gipadayag niini ang ilang kabalaka nga masagulan unya og pamolitika ang bag-ong sistema sa pagpili og mga manindahay ug aduna sila’y paboran nga negosyante.
Kahinumduman nga ang phase 1 gihulagway nga substantially complete na niadto pang Abril 8 ug gipasabot ni City Engineer Gamaliel Vicente Jr. nga mahimo nang magamit ang bag-ong building. (BANAT NEWS)