CEBU, Philippines – Mohimo og pakisusi si Secretary Leoncio “Jun” Evasco Jr. og mga dapit sa Bohol nga mamahimong tukoran sa drug rehabilitation facilities sa gobiyerno.
Si Evasco kinsa mao usab ang pangulo sa Housing and Urban Development Coordinating Council (HUDCC) nitug-an sa Banat News nga mangita sila og laing lugar sa Bohol nga kabutangan sa pasilidad.
Kini tungod kay ang duha ka mga dapit nga una nilang napilian walay linya sa tubig ug kuryente.
Sumala pa ni Evasco, walay problema sa budget sa rehab center apan ang kinahanglan nga aduna kini linya sa tubig, kuryente ug dali rang maadto sa mga tawo.
Si Evasco kinsa usa ka kanhi pari mipahibalo usab nga gusto nilang himoong modelo ang community based drug rehab program sa Archdiocese of Cebu ug sa Barangay Subangdako sa Mandaue City pagtabang sa mga tawo nga boluntaryong nitalikod sa ilegal nga drugas. -/EIM (BANAT NEWS)