CEBU, Philippines – Nadakpan sa kapo-lisan ang nalambigit sa ilegal nga sugal nga swertes apan nasakmitan sab og shabu ug kahimanan sa paggamit sa managkalahing operasyon sa kapolisan sa Dakbayan sa Mandaue ug Lungsod sa Cordova.
Sa Hilutongan Island sa Cordova nadakpan ang gikatahapang pusher nga babaye nga ilang giila nga si Teresita Marieta Premacio, 47-anyos, nagpuyo sa maong dapit.
Pinangulohan sa hepe nga si Senior Inspector Clemente Ceralde, gipahigayon ang buy-bust operation diin nasakmit ang unom ka gagmay nga pakete balor og P1,800.
Samtang sa Zone Tamatis, Barangay Paknaan, Dakbayan sa Mandaue maoy nadakpan ang duha sa managlahing sitio nga nagpasiugda og ilegal nga sugal nga swertres.
Si Police Officer 3 Rey Patigdas sa Presinto 5 sa Mandaue City Police Office (MCPO) niila sa duha nga nadakpan nga sila si Antonio Emenaque, 19, ug Jovelito Toring, 29, ug naluwas sab ang usa ka 15-anyos.
Nasakmit gikan sa mga dinakpan ang stub nga gisuwatan og kombinasyon sa mga numero sa swertres ug ingon man mga drug paraphernalia. -/GMR (BANAT NEWS)