CEBU, Philippines - Lima ka buwan nga puya, gilabay sa wala mailhing tawo sa basurahan sa may Sitio Sombria sa Barangay Lawaan II sa Dakbayan sa Talisay niadtong Miyerkules sa tungang gabii.
Gibutyag ni PO1 Romanito Dinapo sa Talisay City Police Station nga ang Barangay Health Worker sa nahisgutang barangay ang nitawag kanila aron itaho ang ilang nadiskubrehan.
Matud niini, gibana-bana nga anaa sa lima ka buwan ang maong puya apan wala nila mahibaw-i kun babaye o lalaki ba kini.
Siya nagkanayon nga ang ginganlan og Lito maoy unang nakakita sa puya sa dihang nilabay kini og basura ug nakapanimaho og laing baho sa nahisgutang lugar. Dihang iyang gisuta, iyang nakita ang puya hinungdan nga nitawag siya sa taga barangay.
Ang maong puya gipangitaan og lugar aron kini mahatagan og pormal nga paglubong ingon man pag-ampo human kini gi-among-amongan sa wala’y puangod nga ginikanan. (BANAT NEWS)