Kap Lopez wa magpa-drug test kay na-trauma

CEBU, Philippines - Gipaubos sa surprise mandatory drug test ang mga barangay kapitan sa Dakbayan sa Sugbo pinaagi sa Cebu City Office for Substance Abuse Prevention (COSAP).

Nasayran nga 56 lang ka kapitan ang mipaubos niini ug aduna kini kausaban kay sa pagpangihi mahibaw-an dayon kun sila positibo.

Gipasabot ni Dr. Alice Utlang pangulo sa COSAP nga gihimo nila kini aron pagwagtang sa pagduda sa mga kapitan nga matud pa ipang-swap ang ilang mga ihi.

Gihimo nila kini sanglit dili nila buot nga masubli ang nahitabong drug test kaniadto diin nagpositibo si Busay Barangay Captain Amilo Lopez. Apan dihang gihimo ang confirmatory test negatibo ang resulta.

Dugang ni Dr. Utlang kun adunay magpositibo, dili nila kini ipahibawo sumala sa bag-o nilang guidelines. Diha ra nila kini ipahibawo kun human sa confirmatory test.

Sa iyang bahin, si Kapitan Lopez miingon nga miadto siya apan wala siya magpa drug test kay na-phobia siya sa nahitabo kaniadto ug nawagtangan siya og pagsalig kang Dr. Utlang.

Iyang giklaro nga gusto siyang magpa-drug test apan dili lang sa COSAP kay hangtud karon, wala pa mawagtang ang kasakit ug kauwaw nga gibati sa iyang pamilya.

Ugmang adlawa gipaabot nga mopaubos sa drug test si Lopez sa Crime Lab sa Cebu City Police Office subay na usab sa rekomendasyon ni Konsehal Dave Tumulak.

Samtang si ABC President ug Tisa Barangay Captain Philip Zafra miingon nga kadtong mga kapitan nga wala malakip sa drug test kagahapon, karong adlawa himoon ang ila. (BANAT NEWS)