CEBU, Philippines - Patay ang usa ka lalaki human gipauwanan og bala sa duha ka tawo nga nagsakay og motorsiklo sa Villa Estellita Subdivision, Bulacao, Dakbayan sa Talisay kagahapon sa kadlawon.
Ang biktima mao si Philip Ver Rojas, 27, ulitawo nga nagpuyo sa nahisgutang lugar, kinsa nagbarug lang daplin sa karsada dihang niabot ang duha nga sakay og motorsiklo ug ang backrider ang walay langan nibunot sa armas dayon pusil sa biktima sa makadaghang higayon.
Nasayran sa kapolisan nga maayong tawo ang biktima apan may gikalalis kini sa niaging adlaw.
Isog nga kapitana
Wala nahadlok si Kapitan Josefina Concial sa Barangay Candulawan, Dakbayan sa Talisay sa mga durugista human sa pagkasikop sa duha ka pushers atubangan mismo sa barangay hall.
Ang ulahing gidakop mao si Jerson Abadiez, 26, ulitawo nga nagpuyo sa Upper Candulawan kinsa nakuhaan og usa ka pakete sa shabu.
Si Concial ang nangunay sa pagpasaka og kaso batok ni Abadiez ug niingon nga wala niya igsapayan nga kontrahan siya sa mga ilegalista sanglit mas daghan ang nalipay samtang wala usab siya nahadlok nga dili na mamotar ang mga paryente sa iyang dinakpan. (BANAT NEWS)