CEBU, Philippines - Mohimo og pakisusi si Konsehal Dave Tumulak, ang deputy Mayor for Police Matters kun unsa ka tinuod ang taho nga matud pa ni-leak ang impormasyon kalabot sa gipahigayong greyhound operation sa Cebu City Jail niadtong adlaw’ng Sabado. Subay sa maong operasyon, nagpasalamat si Konsehal Tumulak kay gamay ra ang nakuha nga kontrabando sa gihimong greyhound operation sa Philippine Drug Enforcement Agency (PDEA-7) sa City Jail. Kay nagpasabot lang kini nga aduna’y kausaban nga nahitabo ilabi na sa mga sakop sa Bureau of Jail Management and Penology (BJMP).
Apan gitataw ni Tumulak nga aduna’y mga pagduda nga giingong may nakapindot sa operasyon sa PDEA-7 ug kini maoy ilang susihon.
Subay niini, si Mayor Tomas Osmeña mihulagway nga usa ka maayong senyales nga menus ra ang nakuhang kontrabando sa City Jail kay kini nagpasabot nga mihimo sila sa ilang trabaho. Hinoon, wala na hatagi og gibug-aton sa mayor ang giingong leakage sa impormasyon sa operasyon. (BANAT NEWS)