Osmeña suportahan sa SRP sales kini kun…

CEBU, Philippines - Ang mga konsehal nga alyado sa Team Rama andam nga mosuporta ni Mayor Tomas Osmeña sa pagbaligya og tulo ka ektaryang yuta sa South Road Properties (SRP) basta ang presyo dili moubos sa P110 mil sa matag metro kuwadrado.

Si Konsehal Raymond Garcia, tsirman sa Committee on Laws and Good Government sa Cebu City Council, miingon nga mopagawas siya og committee report atol sa ilang sesyon ugma sa hapon ug awhagon ang iyang kaubanang konsehal nga suportahan nila ang mayor.

Gani matud ni Garcia nga isugyot niya kang Konsehal Nendel Hanz Abella nga dili na lang idayon ang pagduso og amendatory ordinance nga mag-usab sa ordinansa nga naglatid kun unsaon pagbaligya ang kayutaan sa SRP kay makapalangay ra kini sa tinguha ni Osmeña.

Matud ni Garcia nga imbes mopasar sila og amendatory ordinance, mogama ra sila og resolusyon nga magtugot ni Osmeña nga makabaligya og tulo ka ektaryang kayutaan sa SRP pinaagi sa public bidding ug ang presyo dili moubos sa P110 mil matag metro kuwadrado.

Bisan si Konsehal Joel Garganera nga laing alyado sa Team Rama mipasalig nga mosuporta sa tinguha ni Osmeña pagbaligya og yuta sa SRP, apan kinahanglan nga gawas nga P110 mil ang presyo sa matag metro kuwadrado, ang makapalit mao usab ang mobayad sa capital gains tax. Ang tinguha ni Osmeña nga pagbaligya og tulo ka ektaryang yuta sa SRP gitumong lang aron mapamatud-an niya nga barato ra kaayo ang pagbaligya ni kanhi mayor Michael Rama sa 45 ka ektaryang yuta sa SRP sa presyo nga P38 mil matag metro kuwadrado.

Gusto ni Osmeña nga bawion ang nabaligya na nga 45 ka ektaryang kayutaan pinaagi sa pagpa-revoke sa kontrata, apan mga konsehal nga alyado sa Team Rama dili mosuporta niini. - /EIM) (BANAT NEWS)