CEBU, Philippines - Dul-an P2 milyones ang gigahin sa konseho sa Siyudad sa Talisay aron sa pagpaayo sa buhatan ni Mayor Eduardo Gullas.
Si Konsehal Richard Francis Aznar maoy nipapasar sa maong resolusyon atol sa ilang session niadtong Martes sa buntag.
Si City Engineer Gamaliel Vicente Jr. nibutyag nga mao kini ang labing una nga renovation nga ilang gihimo sa buhatan sa mayor sukad niadtong tuig 2004.
Siya nagkanayon nga igo lang ang maong budget sukwahi sa pagduda sa uban nga dako ra kini nga kantidad nga ilang ipaayo sa buhatan sa mayor.
Ang renovation naglangkub sa mayor’s office, bathroom, conference room, kitchen ug dining room. Aduna kini gidak-on nga 237 metro kwadrado.
Si Vicente nipasabot nga tag P5 mil ang ilang magasto sa matag metro kwadrado sa mayor’s office ug sa conference room samtang tag P10 mil matag metro kwadrado sa bathroom, kitchen ug dining room.
Moabot sa P1,999,900 ang pag-renovate nga gitrabaho sa B.O. Chupuipo Construction.
Dugang ni Vicente nga kinahanglan nga moabot sa lima ka tuig ang periodic maintenance aron ila kining matrabaho. Ang maong buhatan niabot na kini og 13 ka tuig. - /GMR) (BANAT NEWS)