Sugbo lang nahatagan sa dengue vaccine sa CV

CEBU, Philippines - Bugtong ang Sugbo lang sa tibuok Rehiyon-7 ang nakabenepisyo sa dengue vaccine, matud sa hepe sa Provincial Health Office (PHO), Dr. Rene Catan.

Adunay gihimong pagtuon sa Barangay Guadalupe, Dakbayan sa Sugbo diin ang mga bata nga nagpanuigon og 9-anyos pataas gipanghatagan sa nahisgutang bakuna.

Buot ni Catan nga huwaton ang gihimong pagtuon sa Guadalupe kung unsay resulta niini una pa hatagan sa maong bakuna ang mga bata sa probinsiya. Ang maong pagtuon gikatakdang matapos sa buwan sa Nobiyembre niining tuiga.

Ang Department of Health (DOH) gikatakda niining buwana nga manghatag og dengue vaccine apan matud ni Catan nga giuswag ang schedule sa katapusang semana sa Marso niining tuiga. Si Catan niklaro nga uyon siya nga panghatagan og bakuna ang mga bata sa probinsiya tungod kay gilauman nga sa maong pagpanghatag og dengue vaccine mokunhod usab ang kaso sa dengue.

Gipasabot ni Catan nga kung sa usa ka pamilya dunay nabakunahan dili na kini mataptan og dengue o dili na motakud-takod sa tibuok pamilya.

Gibutyag ni Catan nga niining ulahi lang niadto siya sa Manila ug nakig-estorya kang Dr. Julius Lecciones, executive director sa Philippine Children’s Medical Center (PCMC), kinsa maoy proponent sa pagpanghatag og dengue vaccine ngadto sa mga bata.

Matud ni Catan nga iyang nakompirma gikan kang Lecciones nga safety ang maong dengue vaccine ngadto sa mga bata.

Dugang ni Catan nga ang dengue vaccine 65 porsiyento kini nga epektibo ug ang Sanofi Pasteur Inc. kinsa maoy naghimo niini ang motabang sa pag-edukar sa publiko kabahin sa epekto sa dengue vaccine. Gikataho niini nga ang mga bata nga nahatagan og dengue vaccine nakasinati og hilanat, panakit sa ulo, pagkalipong, pagsuka ug mga rashes sa panit diin giingong mao kini ang komon nga reaksiyon. (BANAT NEWS)