CEBU, Philippines - Ang bag-ong pangulo sa mga magsisibya sa radyo ug telebisyon sa Sugbo miawhag sa tanang brodkasters nga matuod ra gyud nga kasayuran ang ilang isibya, ug likayan ang pagdasig sa katawhan aron sila mosalmot sa sugal, sama sa illegal swertres.
Si Fr. Roberto Ebisa, SVD, mihimo sa maong awhag ngadto sa kaubanan niya nga mga magsisibya sa Sugbo human siya manumpa isip tsirman sa Kapisanan ng mga Brodkaster ng Pilipinas (KBP) Cebu Chapter atubangan ni Arsobispo Jose Palma.
Matud ni Fr. Ebisa nga ang mga magsisibya sa radyo ug telebisyon dako kaayo og katungdanan pagsabwag sa tukma nga inpormasyon ngadto sa katawhan nga uhaw sa tinuod nga kasayuran. Si Fr. Ebisa nga maoy general manager sa Word Broadcasting Corporation (DyRF 1215 Khz) ug Power 89.1, niawhag sa mga magsisibya nga dili gyud mohatag og sayop nga saad ngadto sa mga tigpaminaw, susama nga palaumon sila nga modaog sa illegal swertres pinaagi sa ihatag kanila nga numero.
Matud pa ni Fr. Ebisa nga dako kaayo og obligasyon ang mga magsisibya nga mao ang pagtug-an sa kamatuoran, apan nasubo siya kay adunay uban nga motuyo pagtuis sa kamatuoran.
Dinhi sa Sugbo, adunay mga binayran nga programa sa radyo nga ang mga announcers magpatuo nga nasayod sila sa mga kombinasyon sa numero nga modaog sa swertres, apan pabayran nila ang ilang ihatag nga numero sa mga tigpaminaw.
Kining maong modus sa mga mapahimuslanong brodkaster milambo tungod kay daghang tigpaminaw sa kalungsoran magtuo man nga kining maong mga magsisibya nga nagbayad og programa sa radyo nasayod unsay mga modaog nga kombinasyon sa numero. Isip bag-ong tsirman sa KBP Cebu Chapter, mapasalamaton kaayo si Fr. Ebisa sa iyang mga kaubang tigdumala sa lainlaing mga sibyaanan nga mitugyan sa ilang pagsalig ngadto kaniya sa pagdumala sa kahugpongan karong tuiga.
Si Arsobispo Palma miingon nga kinahanglan ang magsisibya mamalandong usab sa komunikasyon ug sa pulong sa Ginoo, kay ang komunikasyon sa Ginoo katumbas niini gugma, kalipay ug kalinaw.
Gawas kang Ebisa, nanumpa usab ang ubang opisyal. Jose Maria "Ayie" Lanza (vice chairman); Juniño Padilla, (vice chairman AM); Leo Lastimosa, (vice chairman TV); Jean Antiporta, (executive secretary); Nicasio " Jhunex" Napallacan, (treasurer); Marchoflix Lucabon, (auditor); William Valencia, Allan Montesclaros, Dale Eric Alcariz , Annabel Lagrosas (PRO). Rene U. Borromeo ug Rowena Capistrano (BANAT NEWS)