CEBU, Philippines - Miabot sa 106 ka mga tawo ang nasikop sa mga sakop sa Cebu City Police Office sa ilang gihimo nga "One Time Big Time" operation nga nagsugod pasado alas 3 kagahapon sa hapon.
Ang hepe sa Investigation and Detective Management Branch, Supt. Ryan Devaras nga maoy mipresentar sa mga suspetsado miingon nga ilang gihimo ang maong operasyon human sa mga nadawat og mga impormasyon sa City Intelligence Branch kabahin sa mga illegal gambling nga nahitabo sa nagkadaiyang dapit ug uban pa nga nahitabong ilegal nga gitug-an sa mga tawo.
Sumala pa ni Devaras nga sa mga nasikop daghan niini ang nalambigit sa ilegal nga sugal apan duna usay nadakpan gumikan sa pagdala og armas ug adunay mga warrant of arrest ug nagdala og ilegal nga drugas .
Si Devaras miingon dungan nga mihimo og operasyon ang 11 ka mga police stations sa dakbayan nga natapos alas 5 sa hapon.
Atol sa operasyon tulo ka mga lugar ang gitutokan nga naglakip sa lugar sa Police Station 5, 6 ug Police Station 11.
Sa 106 nga nasikop dunay duha ka minor de edad sab ang nakuha sa mga polis nga giabagan sa mga barangay officials.
Usa sa mga edaran nga nasikop mao si Marlon Remocaldo, 61, nga taga V. Rama nga gidakop gumikan sa ilegal nga swertres. Si Remocaldo nga nahinabi sa Banat News miangkon nga nagmahay gyud siya. (BANAT NEWS)