CEBU, Philippines - Usa ka inahan nga taga Kapitan Claudio sa Dakbayan sa Toledo ang pwerteng lisanga sa kahadlok human nga matud pa niya gisuwayan pagpalit og tulo ka mga dagkong mga lalaki ang iyang unom pa ka buwang anak.
Ang maong ginang nga si Jeanevie Deiparine, 21, mi-post sa iyang nasinati diha sa iyang Facebook.
Sumala pa niya, nagkugos siya sa iyang anak nianang hitaboa kay nagpaabot siya og masakyan, apan giduol siya sa usa ka dakong tawo ug miingon nga gusto niining paliton ang iyang anak.
Matud pa gusto pa gyud kugoson sa maong tawo ang bata apan wala niya ihatag kay wala siya makaila niini. Dangtan pila ka gutlo matud adunay laing mga lalaki nga kauban sa maong tawo nga niduol ug mikombinsir gihapon kaniya nga ilang paliton ang bata og P10 mil.
Sumala pa ni Deiparine nga nakahinabi sa Banat News pwerte niyang hadloka tungod kay walay tawo nga iyang masangpit nianang tungora. Matud niya daw niuk-ok ang iyang dila sa kahadlok.
Hangtud nga adunay usa ka trisikad nga niabot ug ang drayber matud pa mipasumangil nga iyang uyoan. Human niini namiya dayon ang maong mga lalaki.
Giangkon ni Deiparine nga hangtod karon blangko pa siya ug makuratan tungod sa kalisang. Wala pa usab siya makasumbong niini ngadto sa kapolisan.
Suway nga gikuhaan og pamahayag sa Banat News ang Toledo City Police Station alang sa maong post ni Deiparine sa social networking site apan kanunay lang mo ring ang ilang linya sa telepono. (BANAT NEWS)