CEBU, Philippines - Toledo City Mayor John Henry "Sonny" Osmeña, mahinangpon nga nadakpan si Sangi Barangay Captain Eduardo 'Edwin' Bacalso ug malaumon nga masikop ang lain pang mga kapitan nga nalambigit sa ilegal nga drugas.
Gipadayag ni Mayor Osmeña ang iyang kalipay nga nasikop si Kapitan Bacalso, apan matud niini nga aduna pay upat ka kapitan sa iyang dakbayan nga nalambigit sa ilegal nga drugas ug dugay na kini niyang gipahibalo sa kapolisan sa Toledo.
Sumala pa ni Osmeña, iyang panghinaut nga masikop usab ang uban pang mga barangay opisyal nga nalambigit sa ginadiling drugas aron malimpyo ang gialagarang dakbayan.
Dugang sa mayor nga wala siya masayod kun nganung wala makadakop ang Toledo police nga dugay na man siyang nihatag og marching order nga sikopon ang tanan tawo nga nalambigit sa ilegal nga drugas sa ilang siyudad. Wala siyay nahimo niini kay ang kapolisan ubos man sa Philippine National Police.
Giklaro ni Osmeña nga dili iyang kauban sa partido si Bacalso ug magpaabot na lang siya kun unsay desisyon sa Department of Interior and Local Government may kalabutan sa pwesto sa nasikop nga kapitan.
Suway nga gikuhaan og pamahayag sa Banat News ang hepe sa Toledo City Police Station apan dili kini makontak sa iyang linya sa komunikasyon.
Kahinumduman nga nasikop si Kapitan Bacalso sa mga tinugyanan sa PDEA-7. (BANAT NEWS)