Pahimusli ang JRG Halad; Pasalamat karong Sabado

CEBU, Philippines - Ang The Freeman, Banat News ug ang DYAB sa ABS-CBN mopahigayon na usab og laing JRG Halad Pasalamat karong Sabado. Ang tibuok adlaw nga paghatag og libre nga serbisyo sa katawhan adto himoa sa Gullas Medical Center sa Banilad, Mandaue City.

Si Jose “Dodong” Gullas, tsirman sa The Freeman ug Banat News, maoy nagpasiugda niining maong kalihukan, uban sa iyang hamiling kapikas nga si Ma’am Nena. Ilang giawhag ang mga Sugbuanon sa pagpahimus niining libre nga medical, dental mission ug uban pa nga panerbisyo.

Ikapito na kini ka higayon nga pagpahigayon sa tinuig nga kalihukan nga gitumong aron katabangan ang publiko, ilabi na ang mga kabus. Ang gitanyag nga serbisyo naglakip sa libre nga medical consultation sa mga bata ug hamtong.

Aduna sa’y dermatologic consultation ug pagserbisyo sa kababayen-an sama sa OB-GYNE consultation, cervical cancer screening, pre-natal services, surgical services, pagpanuli. Ang publiko makapahimus usab og libre nga screening aron pag-ila kinsa ang adunay HIV, Leprosy, Schistosomiasis, random blood sugar ug cholesterol level testing, electrocardiogram (ECG) ug pneumococcal immunization.

Molimpyo usab sa mga ngipon, pagpasta sa lungag ug pagpaibot sa ngipon, ingon man pagtudlo unsaon nga mapanalipdan ang ngipon nga dugay kining madunot. Kadtong adunay mga problema sa ilang mata makapahimus usab niining maong kalihukan.

Kadtong mahiligon sa pagbuhi og mga mananap sama sa mga iro ug iring, makapahimus usab sa libre nga pagpamakuna ug makaangkon usab og bitamina sa ilang mga hayop.

Ang mga dili medical nga pangalagad, naglakip sa cooking demonstrations, legal consultation, job referral services, libreng tupi, manicure ug pedicure, acupuncture ug foot reflexology.

Adunay mga kawani sa PhilHealth, NSO, SSS, Pag-IBIG, LTO ug DSWD nga mosalmot sa kalihukan ug moalagad niadtong adunay mga panginahanglan sa naasoy’ng ahensiya, samtang ang TESDA mopadala og mga masahesta nga momasahe sa mga gipangkapoy, ug motudlo usab og pagpangayo’g gubaong cellphone.Ang dental screening pagahimoon hangtod ugma, Biyernes adto sa Dental Infirmary sa UV College of Dentistry sa Gullas Medical College sa Banilad. Kabahin sa kalihukan sa JRG Halad Pasalamat karong tuiga mao ang pagtanyag og usa ka misa alang sa pagkonpirmar sa bunyag.

Si Gullas nagpasalamat sa mga mitabang alang sa kalampusan sa JRG Halad Pasalamat karong tuiga. Labaw’ng gipasalamatan ni Gullas ang iyang kapikas nga wala baliha ang kakapoy aron lang magmalampuson ang kalihukan ug makatampo sila pagtabang sa mga kabus. (BANAT NEWS)