Amang gilugos sa amang

CEBU, Philippines - Gilugos ang usa ka bungol ug amang nga babaye sa usa usab ka bungol nga lalaki sulod sa usa ka publiko nga menteryohan sa dakbayan sa Mandaue.

Si Police Officer 1 Juliet Trogo sa Women’s Children Protection Desk sa Presinto Uno sa Mandaue City Police Office mibutyag nga ang pagpanglugos nahitabo niadtong Domingo, Enero 15, 2017 atol sa Sinulog pasado alas 6 ngadto sa alas 7 sa gabii apan ang biktima inubanan sa iyang pamilya mitaho sa kapulisan kagahapon.

Ang biktima 30 anyos samtang ang suspek 20-anyos. Ang pamilya sa biktima nagdala og translator ngadto sa kapolisan aron sa pagsaysay sa panghitabo.

Matud pa nga gisaysay sa biktima ngadto sa kapulisan klasmet silang duha sa  suspek sa ilang simbahan nga adunay worship o fellowship matag Sabado sa Bgry. Umapad.

Human sa ilang klase naghuwat ang biktima sa duol sa sementeryo sa Mandaue Public Cemetery aron magpaabot og jeep para mosakay padung uli sa Lapu-Lapu.

Ang biktima nakamatikod nga adunay gasunod sa iyang luyo ug nakita niini ang suspek kinsa kalit lang mibitad  kaniya padung sa sud sa maong sam-ang ug didto gikatahong nahitabo ang pagpanglugos.

Tungod sa kahimtang sa biktima wala na mohatag pa og dugang detalye ang kapolisan bahin sa nahitabo sud sa sam-ang.

Pinasikad sa reklamo, daling giadto sa kapolisan ang balay sa suspek sa Brgy. Umapad ug didto gidakop kini ug gidala sa presinto.

Matud pa ni Trogo atol sa pagsikop sa suspek nakamatikod ang kapolisan nga adunay gikuot gikan sa bulsa nga iyaha untang ilabay apan napugngan ug nasuta nga  usa kini ka gamay’ng pakete sa shabu.

Ang suspek pasakaan og kaso sa pagpanglugos ug sa pagbaton og ginadiling drugas. - Lendilyn Alquilos (BANAT NEWS)