CEBU, Philippines - Andam gihapon ang kagamhanan sa Dakbayan sa Sugbo sa pagkolekta sa mga basura human sa Sinulog 2017.
Kini ang gipadayag ni Mayor Tomas Osmeña bisan usa sa problema nga giatubang karon sa siyudad ang paglabay sa basura hinungdan nga ang mayor wala mosulti kung asa ilabay ang basura gawas lang sa pagkolekta niini.
Ang siyudad gikatakda nga mohimo og laing emergency purchase human napupos na ang kontrata sa operasyon sa Jomara Konstruckt Corporation sa paghakot sa basura sa transfer station sa South Road Properties (SRP).
Si Osmeña nagpatawag og special session sa konseho diin gikatakda karong Biyernes sa buntag sumala pa ni Bise Mayor Edgardo Labella.
Samtang ang kadagkuan sa Basilica Minore del Santo Niño makig-alayon sa kagamhanan sa siyudad alang sa paghipos sa mga basura sugod sa nobenaryo hangtud na sa kapistahan.
Kini ang gitug-an ni Fr. Aladdin Luzon, OSA, ang director sa committee on safety and security, peace and order sa Basilica nga nahinabi sa Banat News.
Matud ni Luzon nga sayud siya nga adunay problema sa paghakot sa mga basura apan siya nagtuo nga hugot usab ang suporta sa kagamhanan tungod kay dili lang kini pista sa mga Sugbuanon apan sa tibuok nasud.
Si Luzon nipadayag nga hugot usab nila karong gipatuman ang pagsusi sa tanang tawo nga mosulod sa simbahan aron sa pagseguro nga luwas ang mga manimbahay. -/GMR (BANAT NEWS)