CEBU, Philippines – Patay ang duha ka tawo ug upat ang naangol dihang usa ka Isuzu Elf truck ang nawagtangan og brake kagahapon sa buntag ug nipadulong sa center island sa karsada sa Poog, Toledo City.
Ang nakalas wala pa nailhi tungod kay igo lang kini silang nang-hitch sa Elf gikan sa South Road Properties padulong sa Dakbayan sa Toledo aron sa paghatud og tiles sa usa ka hardware.
Ang mga naangol naila nga sila si Eugene Amarillo, driver, ug mga pasahero niini nga sila si Ralph Hernandez, 30; John Michael Lada, 29, taga Kalunasan, Dakbayan sa Sugbo ug Roy Branola Jr., 28; taga Cambaro, Dakbayan sa Mandaue.
Matud ni Police Officer 3 Chris Gaco sa Toledo City Police Station nga nawagtangan og brake ang maong sakyanan nga gimaneho ni Amarillo samtang nagdulhog sa likuon nga dalan sa Poog, kinse kilometros gikan sa city proper.
Sumala pa ni Gaco nga nawagtangan og control si Amarillo hinungdan nga niigo siya sa center island nga maoy naingnan sa kamatayon sa duha ka tawo human kini nabunal ug nakaangkon og grabeng kadaut sa ulo.
Ang mga biktima dali nga gidala sa Carmen Copper Hospital. - /GMR) (BANAT NEWS)