CEBU, Philippines – Paghinumdom sa nangagi ug pagkamapasalamaton, maoy tipik sa mensahe sa Bag-ong Tuig ni Archbishop Jose Palma sa Archdiocese of Cebu. Matud pa ni Palma, samtang mobiya kita sa tuig 2016 nga puno sa grasya angay kini ipasalamat.
Ang tuig 2016 mao ang tuig sa Gasa sa Extra Jubilee of Mercy dinhi sa Arcdiocese of Cebu. Angay ipasalamat ang malamposon ug mabungahon nga pag-host sa 51st International Eucharistic Congress.
Sumala pa ni Palma, samtang maglawig sa tuig 2017 dili kalimtan ang nangagi ug angay gihapon kining ipasalamat.
Kay bisan gitak-opan na ang Extraordinary Jubilee of Mercy apan sa gihapon nipahimangno si Pope Francis nga dili gyud siradohan ang pultahan sa kalooy sa atong kasing-kasing ug ipabilin kining bukas ngadto sa atong mga kaigsuonan.
Gibutyag sa Arsobispo, niining pagsugat sa tuig 2017,ang tutokan karon ang pagtagad sa parokya “ a communion of communities.”
Ipabatyag kanunay ang gugma sa matag Santos nga Misa, i-localized matag parish community.
“We commence our journey together as one family, one community, so that we can “look forward to the future with confidence,” matud pang Palma.
Dugang pa sa Arsobispo, maestablisar nga aktibo ug buhi ang parokya kung ang tanan magtinabangay sa conversion (Metanoia), pagpaambit sa gasa (Charismata), sinsero nga pagsaulog sa Eucharist ( Eucharistia), pagserbisyo sa usag-usa (Diakonia) ug ang pagpuyo sa usa’g-usa nga malipayon pinaagi sa fellowship (koinonia) giniyahan sa lima ka haligi.
Ang arsobispo nipadayag nga pinaagi sa giya sa Mahal nga Birhen sa Guadalupe de Cebu, ang patrona , San Pedro Calungsod ang katagilungsod. - /EIM) (BANAT NEWS)