CEBU, Philippines - Gipahibawo sa Deputy Mayor for Police Matters sa dakbayan sa Sugbo nga si Konsehal Dave Tumulak nga ang Department of the Interior and Local Government kon DILG, nipagawas na sa memorandum circular sa pagdili sa pagpamaligya og pabuto sulod sa mga mall ug sa kadalanan nga wala gideklarar nga firecracker zone sama sa South Road Properties kon SRP.
Matud ni Konsehal Tumulak nga angay mahibawo niini ang publiko aron dili mahibulong kun kumpiskahon ang ilang mga pabuto nga ipamaligya diha sa kabarangayan, kadalanan ug sa mga malls.
Ang masakpan nga mamaligya og pabuto, kumpiskahon kini ug i-revoke ang permit sa Department of Trade and Industry.
Dugang ni Tumulak nga maghimo sila og task force nga mosuroy sa mga dapit nga ilegal nga mamaligya og pabuto ug mahimo sab tawagan ang ilang command center kun ugaling adunay dili motuman sa nahisgutang memorandum circular nga gipakanaog sa DILG pinaagi ni Regional Director Rene Burdeos.
Gibutyag ni Tumulak nga ang manindahay og mga pabuto sa mga sidewalk maoy bantayanan kaayo kay peligro kini ngadto sa publiko. (BANAT NEWS)