Paghatag og condom sa tinun-an gisupak

CEBU, Philippines - Si Gobernador Hilario Davide, III wala makauyon sa plano sa Department of Health (DOH) sa pagpanghatag og condom ngadto sa mga eskuylahan aron kapugngan ang pagdaghan sa mga kabataang natakboyan og Human Immunodeficiency Virus (HIV) ug Acquired Immune Deficiency Syndrome (AIDS).

Matud ni Davide  sama ra kini nga gihatagan og pagtugot ang kabataan nga makighilawas basta mogamit lang gyud og condom.

Sumala pa sa gobernador mas maayo pang ang kwarta nga gipamalit og condom ipatukod na lang og mga classroom kay mas kinahanglan kini sa mga tinun-an.

“You’re giving them the wrong idea nga it’s okay to have sex as long as they are protected, dili man na mao,” pasabot pa ni Davide. Dili siya uyon sa ideya nga ang condom maoy makakontrolar sa pagkuyanap sa HIV ug AIDS kay mas maayong edukahon ang kabataan kabahin sa mga risgo sa pre-marital sex. Sayo pa, gikataho nga ang Dakbayan sa Sugbo dunay taas nga kaso sa HIV ug AIDS sulod sa unang duha ka buwan sa tuig 2016 diin 10 ang aduna nay full- blown AIDS ug 117 ang asymptomatic cases.

Ang Dakbayan sa Mandaue maoy nagsunod diin duna kini duha ka kaso sa full- blown ug walo sa asymptomatic samtang ang Dakbayan sa Lapu-Lapu dunay usa ka kaso sa full- blown ug lima ka asymptomatic, sa lungsod sa Minglanilla dunay natala nga usa ka full-blown ug tulo ka asymptomatic.

Ang asymptomatic status giingong ang pasyente nga duna nay HIV apan walay mga simtomas nga nasinati.

Ang DOH nibutyag nga ang trend karon sa mga natakboyan nagkaanam og kabatan-on gikan sa edad nga 14 hangtud 24 anyos. (BANAT NEWS)