CEBU, Philippines - Batan-on nga giingong nakainom samtang nagmaneho og motorsiklo ang nakutloan sa iyang kinabuhi human nabangga sa gutter sa may Bacayan, Dakbayan sa Sugbo. Ang nakalas nailhan nga si Mark Jason Antig, 20-anyos, ug tinun-an sa criminology sa usa ka unibersidad sa dakbayan.
Padulong mouli ang biktima sa ilang balay dihang nabangga kini sa poste ug didto nalamba sa gutter sa may Villa Del Rio sa maong barangay.
Matud ni Manuel Tagaan sa record section sa Cebu City Transportation Office nga hangtud niining pagsuwat wala pay mga tagtungod nga nidangop sa morgue sa Cebu City Medical Center aron pagkuha sa patay’ng lawas sa batan-on. Sumala pa ni Tagaan nga padayon pa silang nihimo karon og imbestigasyon kay limitado lang ang ilang impormasyon nga nakuha tungod kay walay kuyog ang biktima atol sa hitabo.
Giawhag ni Tagaan ang mga nakakita sa aksidente nga mopatim-aw sa ilang buhatan aron makakuha usab sila og dugang kasayuran. (BANAT NEWS)