CEBU, Philippines - Tulo ang patay, duha kanila napusilan sa mga polis atol sa anti-illegal drugs operation diha sa Sitio Taboc, Brgy. Poblacion pasado alas 4 sa nakalabay nga hapon.
Ang duha nga napatay sa mga polis giila nga sila si Jobert Tilano, kinsa maoy target sa mga operatiba ug si Arjun Sampang, most wanted sa Carmen Police Station sa kaso nga robbery.
Ang hepe sa Danao City Police, Sr. Insp. Alejandro Batobalonos nga nahinabi sa Banat News miingon nga taud-taod na nila nga gipanid-an ang ilegal nga kalihokan ni Tilano nga pirmeng makaikyas sa police operations.
Sumala pa ni Batobalonos nga si Tilano dili mobaligya og ginagmay nga shabu sa dili niya kaila, kadtong iyang mga suki nga ginagmay ra og paliton diha ra gyud niya pasuyopon sa iyang balay. Gamit ang P7 mil nga budol money nakapalit og dako nga bultong shabu ang asset sa kapulisan hinungdan nga gisulod dayon kini sa mga polis ang gipuy-an sa suspetsado.
Si Batobalonos miingon nga ilang nasigpatan ang duha sa gawas sa balay ug dali nga nanagan pasulod hangtud nahitabo ang pinusilay ug napusilan ang duha.
Gidala sila sa Cebu Provincial Hospital sa Dakbayan sa Danao apan nakabsan sila sa ilang gininhawa. Nakuha sa polis gikan sa mga suspetsado ang usa ka .357 revolver ug usa ka .38 revolver nga dunay mga bala. Sulod sa balay nadakpan sab sa mga polis ang tulo ka mga lalaki nga gituohang manuyopay nga sila si Roly Samson, 27, Jonie Valeroso, 33, ug Charlie Luchavez, 36, nga nakuhaan og drugas ug drug paraphernalia.
Narekober sab sa mga polis ang pinaketeng shabu nga mikantidad sa P41, 300.
Sa laing bahin, patay usab ang gidudahang nalambigit sa ilegal nga drugas nga gipusil sa sulod sa ilang panimalay atol sa ilang panihapon uban sa iyang asawa ug mga anak sa Upper Labogon, Dakbayan sa Mandaue.
Si Police Officer Robinzoro Anor sa Presinto 3 sa Mandaue City Police Office (MCPO) miila sa namatay nga mao si Jonn Hope Agustin Corbo, 39, nagpuyo sa maong dapit.
Matud pa ni Anor nga nanihapon ang pamilyang Corbo dihang kalit nga nanulod ang duha ka wala mailhing lalaki nga nagtaptap sa ilang mga nawong ug gipusil ang biktima atubangan sa pamilya niini.
Nakuha sa crime scene ang lima ka mga kabhang sa armas sa kalibre .45.
Matud ni Anor ang namatay nalakip sa listahan sa mga drug personalities nga wala motahan sa Oplan Tokhang sa miaging bulan. (BANAT NEWS)