Inspeksiyon sa karne gihugtan

CEBU, Philippines - Giawhag sa hunta probinsiyal ang tanang meat inspectors nga hugtan ang pagsusi sa mga karne sa kamerkaduhan sa tibuok probinsiya aron maseguro nga walay double dead nga karne nga gipamaligya.

Ang Cebu Provincial Veterinary Office (CPVO) nilusad na og inspection sa kamerkaduhan sa probinsiya nunot sa nagsingabot nga Pasko.

Si Bokal Thadeo Jovito “Jonkie” Ouano nagkanayon nga kinahanglan nga palapdan ang pagpahigayon og inspection sa mga karne sa kalungsuran ug mga siyudad.

Si Ouano niawhag sa mga konsumedor nga adto mopalit og mga karne sa mga meat shop nga nailhan na ug kung anha mopalit og karne sa merkado kinahanglan nga tarungon nila kini sa pagluto.

Matud ni Ouano nga aron maseguro nga limpyo ang supply sa karne, ang kagamhanan sa probinsiya mopahigayon og tulo ka adlaw nga training sa pag-upgrade sa ilang meat inspection services sa tanang meat inspectors sa probinsiya.

Ang mga meat vendors giawhag sab sa pagpaubos sa inspection sa ilang mga karne nga baligya. (BANAT NEWS)