CEBU, Philippines - Wala makapausab sa ilang baruganan ang bagyong Marce nga nagdala og mga pag-ulan kagahapon atol sa paglusad sa gitawag nga “Black Friday Protest” dinhi sa Cebu City nga nagpadayag sa ilang pagsupak sa paglubong sa kanhi diktador Ferdinand Marcos diha sa Libingan ng mga Bayani.
Ang nilusad og protesta gipangulohan sa mga walhong militante, apan sukwahi sa nanglabay nga mga protesta batok sa paglubong kang Marcos, ang mga nakasuwat sa placards nagsentro tanan ngadto ni Presidente Rodrigo Duterte.
Matud ni Bayan Central Visayas Secretary General Jaime Paglinawan ilahang gipanawagan si Duterte nga putlon ang pakiglambigit niini sa pamilyang Marcos.
"Nagtan-aw siya (Duterte) nga aduna siya'y utang kabubut-on sa mga Marcos. Presidente na siya ug angay na siyang magtan-aw sa kabubut-on sa katawhan,” matud pang Paglinawan.
Giawhag usab nila si Duterte nga hunongon na kining “patronage politics” kay nagtuo sila karon nga nakautang og kabubut-on ang presidente ngadto sa mga Marcos tungod sa suportang gihatag sa Ilocandia atol sa eleksyon.
Sumala pa niya dili kini maoy gipanaad ni Duterte kondili ang kausaban. Ilang giawhag si Duterte nga ihatag ang hustisya sa mga nabiktima sa Martial Law ug mangusog sama sa nangaging mga presidente pagbawi pabor sa gobiyerno sa mga kwartang gikawkaw sa mga Marcos.
Ang mga nag-organisar sa kalihokan nangangkon nga 300 ka tawo ang nanambong apan wala kini makabalda sa trapiko.
Karong Nobiyembre atol sa Bonifacio Day adunay susamang lihok protesta silang pagahimuon.Gikan sa The Freeman (BANAT NEWS)