CEBU, Philippines - Ang pagpamuhat og pusil sa dakbayan sa Danao lisud ma-regulate matud pa sa hepe sa Cebu Provincial Anti-Drug Abuse Office (CPADAO) nga si Carmen Remedios Durano-Meca kinsa kanhi opisyal sa maong siyudad.
Gipasabot ni Meca nga wala’y permit gikan sa mga authorized gun manufacturer ang pagpamuhat og pusil sa siyudad hinungdan nga dili gyud kini mahimong legal.
Matud ni Meca nga kasagaran nga maghimo og pusil sa Danao “backyard making” o mag-iya-iya kini.
Gibutyag ni Meca nga kaniadto ang lokal nga kagamhanan sa dakbayan sa Danao migama og mga lakang nga ma-regulate ang paghimo og pusil sa siyudad.
Apan ang mga mamuhatay og pusil wala magkasinabot aron sila magkahiusa nga adunay kompaniya o kooperatiba nga magdumala kanila.
Kay naila ang dakbayan sa Danao sa pagpamuhat og pusil, gituohan nga dinhi nagagikan ang mga armas gikan sa mga nangasikop nga mga tawo.
Ang ubang mga pusil nga nasakmit sa mga polis gigamit sa mga kriminal.
Giingong ang tinago-tago nga pagpamuhat og pusil sa Danao gihimong panginabuhian sa ubang residente.
Kahinumduman nga si Gobernador Hilario Davide, III nipadayag sa iyang pag-uyon nga ma-legalize ang pagpanghimo og mga pusil sa Danao aron dili na magsalig og pamalit og mga pusil ngadto sa laing nasud. Subay kini sa pagbakwi ni Presidente Rodrigo Duterte sa kasabutan sa pagpamalit og mga assault rifle ngadto sa Amerika. Ang kapolisan maoy mogamit unta sa pamaliton nga mga armas.
Si Duterte nagkanayon nga adto na lang siya mamalit og pusil sa nasud sa Russia. Nunot kini sa gipadayag ni US Senator Ben Cardin nga mobabag siya sa maong pagpamalit sa Pilipinas og mga pusil subay sa giingong nahitabong extra judicial killings dinhi sa nasud nga adunay kalambigitan sa gubat batok sa ginadiling drugas ni Duterte. (BANAT NEWS)