CEBU, Philippines - Gipang-apod-apod sa hepe sa kapolisan sa dakbayan sa Talisay ang iyang mga sakop sa mga lugar nga adunay nagpasalida og away ni Senador Manny Pacquiao ug ni World Champion Jessie Vargas karong adlawa.
Matud ni PSupt. Emerson Dante nga magmingaw gyud ang mga oras inig tungtong ni Pambansang Kamao sa ring alang sa pagsinukliay og kumo sa iyang kontra nga si Vargas.
Si Dante niingon nga wala sila’y kumpiyansa kay basin og aduna sa’y mga dautang elemento nga mopahimos sa maong higayon, kini subay na sa gipahugtang seguridad sa habagatang bahin sa lalawigan sa Sugbo.
Nipahimangno si Dante sa katawhan nga dili lang ihatag ang tanang salig sa kapolisan ug angay sab sila nga mag-amping sa ilang kaugalingon ug mahimong igmat sa mga tawo nga ilang mabantayan nga bag-o lang sa ilang lugar.
Kasagarang plastadahan og polis mao ang mga malls, mga complex ug bisan asa nga lugar nga aduna’y ipahigayon nga pay-per-view.
Gawas sa mga polis, kuyogan sab sila sa mga sakop sa armadong kusog sa nasud.