Budget sa Talisay mapasar nga way hasol

CEBU, Philippines – Gipasalig ni Bise Mayor Alan Bucao sa Siyudad sa Talisay nga wala nay hasol ug ila maaprobahan ang gipangayo nga 2017 annual budget ni Mayor Eduardo Gullas sa dili pa matapos ang buwan sa Nobiyembre.

Matud ni Bucao nga naghinay-hinay na sila sa pagtuon sa budget nga moabot sa P887.9 milyones.

Asoy pa niya nga iya ra’ng gipasagdan ang iyang kaubanan sa konseho bahin niini ug siya niingon nga posible nga adunay paglaslas sa ubang departamento apan pun-an ang laing departamento o proyekto nga mas kinahanglanon gyud kaayo.

Nagkanayon si Bucao nga nakasaad sila ni Gullas nga ila kining maaprobahan sa dili pa mahuman ang buwan sa Nobiyembre.

Ang mayoriya sa konseho sakop sa Partidong Alayon nga gipangulohan ni Gullas.

Nasayran nga nahimong kontrobersiyal ang pagpasar sa budget panahon ni kanhi mayor Johnny de los Reyes nga napuno sa paglaslas.

Ang konseho kaniadto ang gidominar sa mga sakop sa Alayon ug si JVR sakop sa Liberal Party.

Samtang si Bucao nibutyag nga posibleng mopasar sab sila og katapusang supplemental budget sa dili pa matapos ang tuig tungod kay nakasaad man si Gullas sa mga magtutudlo sa pangpublikong tunghaan nga dugangan ang ilang binuwan nga allowance ngadto sa usa ka libo ka pesos. - /GMR) (BANAT NEWS)