CEBU, Philippines - Nakadawat og ayuda ang upat ka lungsod sa Rehiyon 7 gikan sa Environmental Management Bureau sa Department of Environment and Natural Resources-7 sa pag-establisar og Material Recovery Facility (MRF) ug sa saktong paghipos sa basura.
Kini mao ang Lungsod sa Argao, Poro ug Sogod sa Probinsiya sa Sugbo ug Jagna sa Probinsiya sa Bohol samtang gikatakda nga modawat sunod buwan mao ang Consolacion, Daanbantayan ug Aloguinsan sa Probinsiya sa Sugbo; Tagbilaran City, Tubigon ug Talibon sa Bohol ug Dakbayan sa Sugbo
Atol sa pagpirmahay og memorandum of agreement kagahapon, si EMB-7 Director William Cuñado nibutyag nga ang matag local government unit makadawat og P300 mil isip ayuda sa pagpalambo sa gi-establisar nga MRF ug shredder nga mobalor sa P200 mil.
Si Cuñado naglaum nga dili mausik ang ayuda nga ilang gihatag diin tumong nila mao nga ma-convert ang mga basura ug makahatag kini og income ngadto sa mga LGU pinaagi sa paggamit og teknolohiya aron mahimong composting ang mga malata nga basura ug ma-convert ang ubang basura ngadto sa enerhiya.
Tumong sab niini nga kaminusan ang mga basura nga malabay sa mga sanitary landfill aron mga residual ug special waste na lang ang ilang makolekta.
Gitug-an ni Cuñado nga target nila nga maapuran ang tanang LGUs sa rehiyon sa maong ayuda sunod tuig tungod kay ang ilang ahensiya nitagana na og P760 milyones nga budget nga magamit lukop nasud ug gibana-bana nga P5 milyones ang madawat sa Central Visayas.
Gibutyag ni Cuñado nga sa kasamtangan, 60 porsiyento sa mga nakolektang basura ang biological waste diin kun matarung lang kini dili na unta kini malabay sa mga landfill.
Si Argao Mayor Stanley Caminero mapasalamaton sa ayuda nga gihatag sa EMB sa ilang lungsod ug nipasalig nga mosuporta sa tanang proyekto nga makahatag og kaayuhan sa kalikupan ug sa katawhan. (BANAT NEWS)